Home Slider

Anihan Technical School is a project of The Foundation for Professional Training, Inc. (FPTI). Established in 1986.

Thursday, April 14, 2011

The Road to Success: Anihan Gaduates' Stories (Part 2 of 2)

Anihan Technical School held its 24th Commencement Exercises on April 8, 2011. The Guest speakers who gave the inspirational messages on that special day were two Anihan alumnae who graduated in 2006. Both did their on-the-job-training in The Palms Country Club and were immediately employed by the same establishment after their graduation. Below are excerpts of the second speech:


Ma. Erika Caguicla, Commis 1
Nishijin Japanese Restaurant, The Palms Country Club



Ako po si Ma. Erika Caguicla, Anihan Graduate. Hayaan nyo pong ibahagi ko sa inyo ang masasabi kong pangarap ko na ngayon na natupad, ang humarap sa mga kabataan na nagsisipagtapos kasama ng kanilang mga magulang upang magsilbing inspirasyon at mabuting ehemplo, na nagmula mismo sa aking karanasan.

Bata palang po ako, mapangarapin na ako. Ito po siguro ay sa dala na rin ng sitwasyon namin sa buhay. Lumaki po ako sa isla sa probinsya sa QUEZON kung saan ako nagtapos ng high school... Tumigil ako ng dalawang taon at sa mga taon na iyon pumasok ako ng trabaho sa Chowking dito sa Calamba bilang cashier. Tiniis ko na malayo sa pamilya at makitira sa taong hindi ko kakilala para kumita ng pera at kahit konti ay makatulong. Hanggang sa dumating ang magandang pagkakataon na hindi ko inaasahan, ang makapasok ako sa Anihan...

...Naging working student po ako, nag-aaral sa maghapon at pagdating ng 5 p.m. dapat nasa trabaho na ako bilang cashier... Kinailangang gumising ng maaga kinabukasan para mag-ayos ng bahay sapagkat ako'y nakikitira lamang. Mahirap pumasok ng medyo basa pa ang uniporme, inaantok sa oras ng klase, mag-cash advance para may pamasahe at pang-ambag sa school (para sa ingredients). Iniisip ko na lang na para ito sa pamilya ko at syempre sa pangarap ko.

Matagumpay kong natapos ang aking pag-aaral dito sa Anihan sa tulong narin ng mga taong laging gumagabay. Dala ng pagsisikap ako'y kinuha ng kumpanya kung saan po ako nag-OJT kasama nang iba ko pang kamag-aral upang doon ay magtrabaho, ito po ay ang The Palms Country Club, na hanggang sa kasalukuyan ay maglilimang taon na. Sa aking pagtatrabaho hindi pala pwedeng basta ka lang papasok at kikita ka na ng pera.  Hindi ganun kadali at napatunayan ko na...

Sa una pa lang, ako ay na-assign na sa Nishijin Japanese Restaurant ng club... Kahit na ako’y nag-iisang babae nagpursige akong makipagsabayan sa mga kapwa kong kusinerong mga lalaki.  Andyan na ipina-memorize sa akin ang mga salita sa hapon na aaminin kong hindi ko agad naintindihan... ang masigawan sa harap ng guest na kumakain... ang magkatay ng isda na mas mabigat at malaki pa sa akin.  Hindi po masamang umiyak, umiyak ako noon hindi dahil sa ako ay sumusuko na o ayaw ko na. Ang pagluha ko ay katumbas lang ng lalo kong pagmamahal sa trabaho ko... Nasasa-akin nalang po kung paano ko po ito dadalhin, sa positibo ba o sa negatibong pananaw.

Ngayon ako na ang kanang kamay ng Chef sa Nisijin Japanese Restaurant ng The Palms Country Club... Effective talaga ang pagdarasal ko sa loob ng elevator bago magsimula sa araw-araw ng aking buhay at pagtatrabaho.  Maraming salamat sa Panginoon.

Patuloy parin ang aking pagsisikap para sa pamilya ko kasi po ang kaligayahan ko ay makitang masaya ang magulang ko at maging mabuting halimbawa sa mga kapatid ko.

Sa mga magsisipagtapos ngayon, libre ang mangarap. Ang mahalaga ay samahan natin ito ng dasal, dedikasyon at pagsisikap. Hangad ko rin na tulad ko, ang pangarap niyo ay matupad niyo!

Muli, binabati ko kayo ng MALIGAYANG PAGTATAPOS! CONGRATULATIONS!
 (Click this to go to Part 1)

Monday, April 11, 2011

The Road to Success: Anihan Gaduates' Stories (Part 1 of 2)

Anihan Technical School held its 24th Commencement Exercises on April 8, 2011. The Guest speakers who gave the inspirational messages on that special day were two Anihan alumnae who graduated in 2006. Both did their on-the-job-training in The Palms Country Club and were immediately employed by the same establishment after their graduation. We reproduce here excerpts of their speeches.

Sherry May Benjamin, Commis 2
OIC, Continental Kitchen, The Palms Country Club

Sherry May was moved to tears during her speech as she recalled her family's hardships while she was still studying.

Magandang hapon po sa inyong lahat. Isa rin po akong graduate na gaya ninyo sa eskwelahang ito, at minsan ring naging bahagi ng ganitong pagtatapos...

...Ang Anihan ang maituturing kong aking pangalawang tahanan. Hindi ko po makakalimutan kung ilang beses na akong pinahinto ng mga magulang ko sa aking pag-aaral dahil sa kakapusan, ngunit naging matatag po ako sa aking desisyon na makapag-aral at makapagtapos. Ang lahat ng natutunan ko sa Anihan ay nagamit ko at nakatulong sa'kin sa pagharap sa buhay, hanggang sa ako po ay na-assign sa The Palms Country Club para mag-on-the-job-training. Kahit alam kong mapapalayo ako sa mga magulang ko, pinili ko 'yun. Gusto ko ding mapatunayan sa sarili ko na kaya ko nang maging independent at mas maging responsable sa buhay. Sa panahon na yun naisabuhay ko lahat ng natutunan ko. Nung una napakahirap mag-adjust, pero kalaunan natuto din akong makibagay.

Napakabait ng aming Executive Chef sa The Palms Country Club dahil pagkatapos ng aming OJT, tinanggap niya kami para makapagtrabaho. Sobrang nagpapasalamat ako sa kanya dahil sa pagtitiwala na binibigay nya sa akin, sa pagtitiyaga nya sa pagtuturo.

Nagsimula ako bilang kitchen helper nung tinanggap na kaming mga trainee para magtrabaho.  Nung una, kinakabahan ako dahil alam kong malaki na ang expectations sa akin ng mga kasama ko sa trabaho, at lalo na ni Chef Hans, ang aming Executive Chef.  Sa dalawang taon kong bilang kitchen helper, marami akong natutunan sa buhay, hindi lang sa pagluluto at paghahanda ng pagkain, natutunan ko ding makibagay sa iba’t ibang klase ng tao para makuha ang respeto na dapat nilang ibigay sa akin, at hindi ako nabigo. Lahat sila ay naging mabuti at may mga aral silang naibahagi sa’kin na magagamit ko sa aking buhay.  Sa punto na napapagalitan ako at umiiyak, hindi ko naisip ang sumuko, bagkus naging inspirasyon ko pa ‘yun para magpatuloy.  Mas naging responsable ako sa ginagawa ko at natutunan kong pahalagahan ang mga guests at members ng country club sa pagbibigay sa kanila ng good at quality food.

Oo, napakahirap magtrabaho sa kusina, nandyan yung sobrang pagod at mahabang oras ng trabaho, yung mga oras na nakakataranta dahil maraming orders, at sasabay pa ang pressure mula sa mga boss. Pero lahat ng ‘yun kinaya ko, naging inspirasyon ko ang mga magulang ko, ang aking mga guro at sponsors na nagtaguyod para marating ko ang aking kinalalagyan ngayon at higit sa lahat ang tiwala na binigay nila sa’kin.

Nung naging regular na ako at na-promote ako bilang Commis 2 at hawakan ko ang fine dining restaurant sa The Palms Country Club, di ko na naman naiwasan ang kabahan. Pero sa tuwing naiisip ko na may nagtitiwala sa kakayahan ko, mas naging pursigido akong kayanin lahat. 

Sobrang masaya po ako dahil makakatulong na po ako kaagad sa pamilya ko. Isa sila sa mga naging inspirasyon ko sa pagtahak ko sa buhay. Kapag iniisip ko ang lahat ng sakripisyo na ginawa nila para mapagtapos lang ako sa pag-aaral, di ko magagawa na sila ay biguin. Anuman ang narating ko ngayon, lahat ng ‘yun ay binigay ng Diyos. Matuto lamang tayong makinig sa Kanya, at naniniwala ako na di hadlang ang kahirapan o kakapusan para maabot natin ang ating mga pangarap sa buhay.

Sa mga graduates natin ngayon, kailangan ninyong maging matatag, at sa masigasig na paggabay ng inyong mga magulang ay hindi imposible na matupad ang gusto niyo sa buhay. At higit sa lahat huwag nating kalimutan palaging magpasalamat sa ating Panginoon na gumagabay sa'tin sa lahat ng oras. Kung ang puso natin at pananampalataya ay nasa Kanya walang mahirap na di natin kayang abutin...

TO GOD BE THE GLORY!

Sa inyong lahat, maligayang pagtatapos! At sa mga sponsors, mga guro at kawani ng Anihan, mga tutors, at mga magulang, MARAMING SALAMAT PO!

MORE ANIHAN NEWS